శిరీష కుటుంబానికి అండగా ప్రభుత్వం
స్రవంతి
తెలంగాణ స్రవంతి ప్రతినిధి • బొగ్గుల శివ నాగిరెడ్డి
ములకలపల్లి మండలం చౌటిగూడెం గ్రామానికి చెందిన ఊకె శిరీష అనుమానాస్పద పరిస్థితుల్లో మృతి చెందిన ఘటనపై రాష్ట్ర పంచాయతీరాజ్, స్త్రీ శిశు సంక్షేమ, గ్రామీణాభివృద్ధి శాఖల మంత్రి ధనసరి అనసూయ (సీతక్క), అశ్వారావుపేట ఎమ్మెల్యే జారె ఆదినారాయణ తీవ్ర దిగ్భ్రాంతి వ్యక్తం చేశారు.
ముఖ్యమంత్రి రేవంత్ రెడ్డి ఆదేశాల మేరకు మంత్రి సీతక్క చౌటిగూడెం గ్రామానికి చేరుకుని శిరీష కుటుంబ సభ్యులను పరామర్శించారు. వారి పరిస్థితిని అడిగి తెలుసుకుని ధైర్యం చెప్పారు. ప్రభుత్వం అన్ని విధాలుగా అండగా ఉంటుందని భరోసా కల్పించారు.
కుటుంబ పరిస్థితిని దృష్టిలో ఉంచుకుని ప్రభుత్వం తరఫున ఇందిరమ్మ ఇల్లు, తక్షణ నష్టపరిహారంగా రూ.5 లక్షలు అందించేందుకు హామీ ఇచ్చారు. అలాగే కుటుంబంలో ఒకరికి ఔట్‌సోర్సింగ్ ప్రాతిపదికన ఉద్యోగం కల్పించేలా చర్యలు తీసుకుంటామని తెలిపారు.
అదేవిధంగా ఐటీడీఏ ద్వారా అవసరమైన సహాయాన్ని అందించడంతో పాటు కుటుంబ జీవనోపాధికి కొంతమేర వ్యవసాయ ప్రభుత్వ భూమిని కేటాయించేలా చర్యలు తీసుకుంటామని హామీ ఇచ్చారు.
ఇప్పటికే శిరీష మృతిపై సమగ్ర దర్యాప్తు జరిపి వాస్తవాలను గ్రహించి నిందితులను ప్రభుత్వం అదుపులోకి తీసుకుందని కుటుంబ సభ్యులకు తెలిపారు. బాధ్యులపై చట్టపరంగా కఠిన చర్యలు తీసుకుంటామని హామీ ఇచ్చారు.
శిరీష కుటుంబానికి వ్యక్తిగతంగా, ప్రభుత్వ పరంగా, పార్టీ పరంగా అన్ని విధాలుగా అండగా ఉంటామని ఎమ్మెల్యే జారె ఆదినారాయణ స్పష్టం చేశారు. న్యాయం జరిగే వరకు కుటుంబ సభ్యులకు అండగా నిలుస్తామని భరోసా ఇచ్చారు.
🔹 కుటుంబంలో ఒకరికి ఔట్‌సోర్సింగ్ ఉద్యోగం
🔹 వ్యవసాయ భూమి కేటాయింపునకు హామీ
🔹 ఐటీడీఏ ద్వారా అవసరమైన సహాయం
🔹 ఘటనపై సమగ్ర దర్యాప్తు
కామెంట్‌లు
కామెంట్‌ను పోస్ట్ చేయండి