హఫీజ్‌పేట్‌ ఘటనపై మానవ హక్కుల సంఘం ఆగ్రహం.. బాధ్యులపై చర్యలు తీసుకోవాలని డిమాండ్‌
హైదరాబాద్‌లోని హఫీజ్‌పేట్‌ రైల్వే స్టేషన్‌ సమీపంలో ఓ మహిళపై దాడి చేసి జుట్టు పట్టుకుని ఈడ్చుకెళ్లినట్లు కనిపిస్తున్న వీడియోపై తీవ్ర స్పందన వ్యక్తమవుతోంది. ఘటనపై సమగ్ర విచారణ జరిపి బాధ్యులపై చట్టపరమైన చర్యలు తీసుకోవాలని ఇండియన్‌ నేషనల్‌ హ్యూమన్‌ రైట్స్‌ ప్రొటెక్షన్‌ కౌన్సిల్‌ చైర్మన్‌ ప్రొఫెసర్‌ నవోదయ సిద్ధార్థ డిమాండ్‌ చేశారు.
వైరల్‌గా మారిన వీడియోలో యూనిఫాంలో ఉన్న వ్యక్తి ఓ మహిళతో ఘర్షణకు దిగి, ఆమెపై దాడి చేసి జుట్టు పట్టుకుని ఈడ్చుకెళ్తున్న దృశ్యాలు కనిపిస్తున్నాయి. ఈ ఘటనపై సోషల్‌ మీడియాలో కూడా స్పందనలు వ్యక్తమయ్యాయి.
ఘటనకు సంబంధించిన పూర్తి వివరాలు, దాడికి దారితీసిన పరిస్థితులు, బాధ్యత ఎవరిది అనే అంశాలపై సమగ్ర విచారణ అవసరమని నవోదయ సిద్ధార్థ పేర్కొన్నారు.
చట్టాన్ని కాపాడాల్సిన బాధ్యత ఉన్న సిబ్బంది ప్రజలతో బాధ్యతాయుతంగా, గౌరవప్రదంగా వ్యవహరించాల్సిన అవసరం ఉందని నవోదయ సిద్ధార్థ అన్నారు. మహిళపై బహిరంగంగా దాడి చేసినట్లు ఆరోపణలు వచ్చిన నేపథ్యంలో ఉన్నతాధికారులు వెంటనే స్పందించి వాస్తవాలను వెలుగులోకి తీసుకురావాలని కోరారు.
అందుబాటులో ఉన్న సీసీటీవీ దృశ్యాలు, వీడియోలు, ప్రత్యక్ష సాక్షుల వాంగ్మూలాలు తదితర ఆధారాలను పరిశీలించి ఘటనకు సంబంధించిన పూర్తి వాస్తవాలను నిర్ధారించాలని ఆయన డిమాండ్‌ చేశారు.
బాధిత మహిళకు అవసరమైన రక్షణ, వైద్య సహాయం, న్యాయపరమైన సహకారం అందేలా అధికారులు చర్యలు తీసుకోవాలని నవోదయ సిద్ధార్థ కోరారు. మహిళలపై దాడులు, అవమానాలు, మానవ హక్కుల ఉల్లంఘనలకు సంబంధించిన ఫిర్యాదులపై అధికారులు వేగంగా స్పందించాలని అన్నారు.
ఘటనపై పూర్తి నిజానిజాలు వెలుగులోకి తీసుకువచ్చి, బాధ్యత వహించిన వ్యక్తిపై చట్ట ప్రకారం చర్యలు తీసుకోవాలని ఆయన డిమాండ్‌ చేశారు.
ఘటనపై రైల్వే అధికారులు స్పందించి సంబంధిత వ్యక్తిపై క్రమశిక్షణా చర్యల ప్రక్రియను ప్రారంభించినట్లు సమాచారం. అతను తెలంగాణ పోలీస్‌ శాఖకు చెందిన హోంగార్డు అని అధికారులు స్పష్టం చేసిన నేపథ్యంలో తదుపరి శాఖాపరమైన చర్యలపై స్పష్టత రావాల్సి ఉంది.
కామెంట్‌లు
కామెంట్‌ను పోస్ట్ చేయండి