మరేపల్లిలో గణేష్‌ మండలికి పోలీసుల సహాయం.. రద్దైన డీజేకు అడ్వాన్స్‌ నగదు వాపస్‌
గణేష్‌ నవరాత్రి ఉత్సవాల సందర్భంగా డీజే ఏర్పాటు చేయవద్దని పోలీసులు సూచించడంతో డీజే కార్యక్రమాన్ని రద్దు చేసుకున్న గణేష్‌ మండలి నిర్వాహకులకు పోలీసులు అండగా నిలిచారు. రెండు నెలల క్రితం డీజే కోసం చెల్లించిన రూ.5 వేల అడ్వాన్స్‌ మొత్తాన్ని పోలీసుల చొరవతో తిరిగి ఇప్పించారు.
కామారెడ్డి జిల్లా డోంగ్లి మండలం మరేపల్లి గ్రామంలో గణేష్‌ నవరాత్రి ఉత్సవాల కోసం ఏకదంత గణేష్‌ మండలిని ఏర్పాటు చేశారు. మండలి నిర్వాహకులు శంకర్‌, శుభం రెండు నెలల క్రితం జుక్కల్‌ మండలం ఖండేబల్లూర్‌ గ్రామానికి చెందిన ఓ వ్యక్తికి డీజే కోసం రూ.5 వేల అడ్వాన్స్‌గా చెల్లించారు.
గణేష్‌ నిమజ్జనం సందర్భంగా డీజే ఏర్పాటు చేయవద్దని పోలీసులు సూచించడంతో మండలి నిర్వాహకులు డీజే కార్యక్రమాన్ని రద్దు చేసుకున్నారు. దీంతో ముందుగా చెల్లించిన రూ.5 వేల అడ్వాన్స్‌ మొత్తాన్ని తిరిగి ఇప్పించాలని పోలీసులను ఆశ్రయించారు.
మండలి నిర్వాహకుల విజ్ఞప్తిపై స్పందించిన మద్నూర్‌ ఎస్సై మోహన్‌రెడ్డి, పోలీసు సిబ్బంది సహకారంతో డీజే కోసం అడ్వాన్స్‌ తీసుకున్న వ్యక్తులను పిలిపించి మాట్లాడారు. అనంతరం రూ.5 వేల మొత్తాన్ని గణేష్‌ మండలి నిర్వాహకులకు తిరిగి ఇప్పించారు.
తమకు రావాల్సిన అడ్వాన్స్‌ డబ్బులు పోలీసుల చొరవతో తిరిగి రావడంతో గణేష్‌ మండలి నిర్వాహకులు సంతోషం వ్యక్తం చేశారు. ఈ సందర్భంగా ఎస్సై మోహన్‌రెడ్డికి, పోలీసు సిబ్బందికి కృతజ్ఞతలు తెలిపారు.
గణేష్‌ నిమజ్జన కార్యక్రమాన్ని శాంతియుతంగా నిర్వహించుకోవాలని, ఎలాంటి అవాంఛనీయ ఘటనలకు తావులేకుండా నిర్వాహకులు పోలీసుల సూచనలు పాటించాలని ఎస్సై మోహన్‌రెడ్డి సూచించారు.
కామెంట్‌లు
కామెంట్‌ను పోస్ట్ చేయండి