21 ఏళ్లయినా అభివృద్ధికి నోచుకోని రాజీవ్ గృహకల్ప కాలనీ.. సీసీ రోడ్ల కోసం సీపీఎం డిమాండ్

21 ఏళ్లయినా అభివృద్ధికి నోచుకోని రాజీవ్ గృహకల్ప కాలనీ

దెబ్బతిన్న రోడ్ల స్థానంలో వెంటనే శాశ్వత సీసీ రోడ్లు నిర్మించాలి

మేడ్చల్ జిల్లా | కుత్బుల్లాపూర్ నియోజకవర్గం
02 సెప్టెంబర్ 2026 | తెలంగాణ స్రవంతి

రాజీవ్ గృహకల్ప కాలనీ ఏర్పడి 21 సంవత్సరాలు పూర్తయినా ఇప్పటికీ పూర్తిస్థాయి అభివృద్ధికి నోచుకోకపోవడం పట్ల స్థానికులు, సీపీఎం నాయకులు ఆందోళన వ్యక్తం చేశారు. ఇటీవల కురుస్తున్న వర్షాలతో కాలనీలోని రహదారులు మరింత అధ్వానంగా మారడంతో ప్రజలు తీవ్ర ఇబ్బందులు ఎదుర్కొంటున్నారని తెలిపారు.

గుంతలమయంగా మారిన రోడ్లు

రాజీవ్ గృహకల్ప కాలనీలోని ప్రధాన, అంతర్గత రహదారులు అనేక చోట్ల గుంతలమయంగా మారాయి. భారీ వర్షాల కారణంగా రోడ్లపై ఏర్పడిన గుంతల్లో నీరు నిలిచిపోవడంతో రాకపోకలకు తీవ్ర ఇబ్బందులు ఎదురవుతున్నాయని సీపీఎం నాయకులు పేర్కొన్నారు.

ముఖ్యంగా చిన్నారులు, మహిళలు, వృద్ధులు నిత్యం ఇబ్బందులు పడుతున్నారని తెలిపారు. ద్విచక్ర వాహనదారులు ప్రమాదాలకు గురయ్యే పరిస్థితి ఉందని, అత్యవసర సమయాల్లో అంబులెన్స్‌లు, ఇతర వాహనాలు సైతం కాలనీలో సక్రమంగా రాకపోకలు సాగించలేని పరిస్థితి ఉందని ఆవేదన వ్యక్తం చేశారు.

తాత్కాలిక మరమ్మతులు కాదు.. శాశ్వత పరిష్కారం కావాలి

దెబ్బతిన్న రోడ్లకు తాత్కాలిక మరమ్మతులు చేసి చేతులు దులుపుకోకుండా, కాలనీ ప్రజల సమస్యకు శాశ్వత పరిష్కారం చూపాలని సీపీఎం నాయకులు డిమాండ్ చేశారు. ప్రధాన రహదారులతో పాటు అన్ని అంతర్గత రహదారులపై నాణ్యమైన సీసీ రోడ్ల నిర్మాణం చేపట్టాలని కోరారు.

21 ఏళ్ల కాలనీకి ఇకనైనా పూర్తి స్థాయి అభివృద్ధి

ప్రజా ప్రభుత్వానికి 1000 రోజులు పూర్తవుతున్న సందర్భంలోనైనా రాజీవ్ గృహకల్ప కాలనీలోని మౌలిక సమస్యలను పరిష్కరించాలని వారు కోరారు. 21 సంవత్సరాలుగా కాలనీ ప్రజలు ఎదుర్కొంటున్న సమస్యలను అధికారులు ప్రత్యేకంగా పరిశీలించి అవసరమైన అభివృద్ధి పనులకు చర్యలు తీసుకోవాలని విజ్ఞప్తి చేశారు.

అధికారులు వెంటనే స్పందించాలి

సంబంధిత అధికారులు వెంటనే కాలనీలో పర్యటించి రోడ్ల పరిస్థితిని పరిశీలించాలని సీపీఎం నాయకులు డిమాండ్ చేశారు. ప్రజల ఇబ్బందులను దృష్టిలో ఉంచుకొని సీసీ రోడ్ల నిర్మాణానికి తక్షణ చర్యలు చేపట్టాలని కోరారు.

సమస్య పరిష్కారంలో జాప్యం జరిగితే కాలనీ ప్రజలను సమీకరించి సీపీఎం ఆధ్వర్యంలో పెద్ద ఎత్తున ఆందోళన కార్యక్రమాలు చేపడతామని నాయకులు హెచ్చరించారు.

ప్రజల ఇబ్బందులు తొలగించాలి
రాజీవ్ గృహకల్పలో వెంటనే సీసీ రోడ్లు నిర్మించాలి

ఈ సందర్భంగా సీపీఎం జిల్లా కమిటీ సభ్యులు రాథోడ్ సంతోష్, సీపీఎం రాజీవ్ గృహకల్ప శాఖ కార్యదర్శి బాల పీర్ తదితరులు మాట్లాడారు.

---

తెలంగాణ స్రవంతి డిజిటల్ మీడియా
జనంనుంచి జనంలోకి
telanganasravanti.in