కోర్టు ఆదేశాలకే అర్థం మారిందా? బోనకల్ పోలీస్ స్టేషన్ విధానంపై విమర్శలు

 

హైకోర్టు బెయిల్ ఆదేశాల అమలులో భిన్నత్వమా?

బోనకల్ SI తీరుపై ప్రశ్నలు

ఖమ్మం జిల్లా, బోనకల్

హైకోర్టు ఇచ్చిన స్పష్టమైన బెయిల్ ఆదేశాలను ఖమ్మం జిల్లా బోనకల్ పోలీస్ స్టేషన్‌లో భిన్నంగా అమలు చేస్తున్నారన్న ఆరోపణలు తీవ్ర చర్చకు దారితీస్తున్నాయి. కోర్టు ఆదేశాల ప్రకారం నిర్దిష్ట సమయంలో పోలీస్ స్టేషన్‌కు హాజరై విచారణకు సహకరించాలనే షరతు మాత్రమే ఉండగా, ఆ షరతును మించి రోజంతా స్టేషన్‌లో కూర్చోబెట్టడం ద్వారా అనవసరంగా ఇబ్బందులకు గురిచేస్తున్నారని బాధితులు ఆరోపిస్తున్నారు.

హైకోర్టు ఉత్తర్వుల్లో “ఉదయం 9 గంటల నుంచి సాయంత్రం 5 గంటల మధ్యలో హాజరు కావాలి” అని మాత్రమే స్పష్టంగా పేర్కొనగా, “ఆ సమయం మొత్తం స్టేషన్‌లోనే ఉండాలి” అనే ఆదేశం ఎక్కడా లేదని న్యాయవర్గాలు స్పష్టం చేస్తున్నాయి. అయినప్పటికీ, బోనకల్ పోలీస్ స్టేషన్‌లో కోర్టు ఆదేశాలను భిన్నంగా అర్థం చేసుకుని అమలు చేస్తున్నారని ఫిర్యాదులు వినిపిస్తున్నాయి.

ఈ విధానం బెయిల్ షరతుల అమలుగా కాకుండా, పరోక్ష కస్టడీలా మారిందన్న విమర్శలు కూడా వ్యక్తమవుతున్నాయి. కోర్టు నుంచి బెయిల్ పొందిన వ్యక్తులు తమ రోజువారీ జీవనానికి, ఉపాధికి వెళ్లే హక్కు ఉన్నప్పటికీ, గంటల తరబడి స్టేషన్‌లో కూర్చోబెట్టడం ద్వారా మానసిక ఒత్తిడికి గురిచేస్తున్నారని బాధితులు వాపోతున్నారు.

న్యాయ నిపుణుల అభిప్రాయం ప్రకారం, కోర్టు ఆదేశాలకు మించి అదనపు షరతులు విధించే అధికారం పోలీస్ అధికారులకు లేదని, హైకోర్టు ఆదేశాలను అక్షరాలా పాటించాల్సిన బాధ్యత ప్రతి అధికారిపై ఉందని స్పష్టం చేస్తున్నారు. బెయిల్ షరతుల పేరుతో వ్యక్తుల స్వేచ్ఛ హక్కులను పరిమితం చేయడం రాజ్యాంగ విరుద్ధంగా పరిగణించబడే అవకాశం ఉందన్న చర్చ కూడా కొనసాగుతోంది.

ఈ నేపథ్యంలో బోనకల్ పోలీస్ స్టేషన్‌లో జరుగుతున్న ఈ వ్యవహారంపై జిల్లా ఉన్నతాధికారులు తక్షణమే స్పందించి, హైకోర్టు ఆదేశాల అమలుపై స్పష్టత ఇవ్వాలని, భవిష్యత్తులో ఇలాంటి పరిస్థితులు పునరావృతం కాకుండా చర్యలు తీసుకోవాలని స్థానికులు కోరుతున్నారు.

— తెలంగాణ స్రవంతి డిజిటల్ మీడియా

జనంనుంచి జనంలోకి