హాజరు ఉంది… బోధన ఎక్కడ? ఖమ్మంపాడు స్కూల్‌పై సంచలనం

ప్రభుత్వ ఉపాధ్యాయుడా? రియల్ ఎస్టేట్ బ్రోకరా?

ఖమ్మంపాడు పాఠశాలపై గ్రామస్తుల ఆగ్రహం – విచారణకు డిమాండ్

మధిర మండలం, ఫిబ్రవరి 20 (2026):

మధిర మండలంలోని ఖమ్మంపాడు గ్రామ ప్రాథమికోన్నత పాఠశాలలో విధులు నిర్వహిస్తున్న ఉపాధ్యాయుడు రేగళ్ల బ్రహ్మారెడ్డి పనితీరుపై గ్రామస్తులు, తల్లిదండ్రులు తీవ్ర ఆరోపణలు చేస్తున్నారు. విద్యార్థుల భవిష్యత్తు ప్రశ్నార్థకంగా మారిందని వారు ఆందోళన వ్యక్తం చేస్తున్నారు.

ఫిబ్రవరి 20 ఉదయం 11 గంటల సమయంలో విద్యార్థుల సూచన మేరకు గ్రామస్తులు పాఠశాలను ఆకస్మికంగా సందర్శించినట్లు తెలిపారు. ఎఫ్ఆర్ఎస్ హాజరు నమోదు చేసిన తరువాత తరగతులకు హాజరుకావాల్సిన ఉపాధ్యాయుడు రేగళ్ల బ్రహ్మారెడ్డి రియల్ ఎస్టేట్ పనుల కోసం ఖమ్మం వెళ్లినట్టు సమాచారం అందిందని పేర్కొన్నారు.

ఈ విషయంపై ప్రశ్నించగా ప్రధానోపాధ్యాయుడు ఆర్.వి. సత్యనారాయణ “బయట పని మీద వెళ్లారు” అని సమాధానం ఇచ్చినట్లు గ్రామస్తులు తెలిపారు. స్థానికులు వేచి చూస్తామని చెప్పిన తరువాత కొంతసేపటికి ఆన్‌లైన్‌లో సెలవు పెట్టినట్టు మెయిల్ వచ్చిందని, సాయంత్రం రారని చెప్పి పంపించే ప్రయత్నం చేసినట్లు ఆరోపించారు.

తరగతి గదిలో బోధనా? ఫోన్ కాల్సా?

గతంలో కూడా తరగతుల సమయంలో ఫోన్‌లో రియల్ ఎస్టేట్, చిట్టీలు, ఫైనాన్స్ వ్యవహారాలపై మాట్లాడేవారని తల్లిదండ్రులు ఆరోపిస్తున్నారు. ప్రశ్నించినప్పుడు రాజకీయ ప్రభావంతో విషయం బయటకు రాకుండా మేనేజ్ చేసుకున్నారని అంటున్నారు. హాజరు నమోదు చేసి వ్యక్తిగత పనులకు వెళ్లడం పరిపాటిగా మారిందని గ్రామస్తులు ఆరోపిస్తున్నారు.

పాఠశాలలో వాస్తవ పరిస్థితి

సుమారు 75 మంది పేద విద్యార్థులు చదువుతున్న ఈ పాఠశాలకు ఎనిమిది మంది ఉపాధ్యాయులు కేటాయించగా, ఒకరు డిప్యూటేషన్‌లో ఉన్నారు. మిగిలిన ఏడుగురు బోధన చేయాల్సి ఉన్నప్పటికీ హాజరు పట్టికలో పూర్తి హాజరు చూపుతున్నా వాస్తవ పరిస్థితి భిన్నంగా ఉందని గ్రామస్తులు చెబుతున్నారు. సిలబస్ కూడా నామమాత్రంగానే నడుస్తోందని తల్లిదండ్రులు వాపోతున్నారు.

అధికారుల దృష్టికి తీసుకెళ్లాలి

విద్యాశాఖ నిబంధనల ప్రకారం విధి సమయంలో ఇతర వ్యాపార కార్యకలాపాల్లో పాల్గొనడం నిషేధం. మండల విద్యాధికారి (MEO), జిల్లా విద్యాశాఖాధికారి (DEO) స్థాయిలో సమగ్ర విచారణ జరిపి వాస్తవాలు వెలుగులోకి తేవాలని గ్రామస్తులు డిమాండ్ చేస్తున్నారు. అవసరమైతే జిల్లా కలెక్టర్ జోక్యం చేసుకుని ప్రత్యేక విచారణ కమిటీ ఏర్పాటు చేయాలని కోరుతున్నారు.
“పిల్లల చదువు కోసం ప్రభుత్వం జీతాలు చెల్లిస్తోంది… కానీ క్లాసులు జరగకపోతే బాధ్యత ఎవరిది?” అని తల్లిదండ్రులు ప్రశ్నిస్తున్నారు.
ఈ ఘటనపై ఉన్నతాధికారులు స్పందించి నిర్లక్ష్యం నిరూపితమైతే చట్టపరమైన చర్యలు తీసుకోవాలని గ్రామస్తులు డిమాండ్ చేస్తున్నారు.

🚨 మధిర మండలంలో సంచలనం…
పూర్తి వివరాలు చదవండి 👇
🔗 https://telanganasravanthi.blogspot.com/2026/02/blog-post_20.html
📢 Telangana Sravanti Digital Media
జనంనుంచి జనంలోకి